Нууцлалын бодлого

Нэг. Ерөнхий зүйл

1.1. Энэхүү Нууцлалын бодлого /цаашид “Бодлого” гэх/-оор Talking Gym үйлчилгээг ашиглахтай холбоотойгоор хэрэглэгчийн хувийн мэдээллийг цуглуулах, боловсруулах, ашиглах, хадгалах, хамгаалах болон устгах нөхцөлийг тодорхойлно.

1.2. Talking Gym Edu LLC /цаашид “Компани” гэх/ нь Talking Gym үйлчилгээний хүрээнд цуглуулсан хувийн мэдээлэл хариуцагч байгууллага байна.

1.3. Энэхүү Бодлогод “Хэрэглэгч” гэж Talking Gym үйлчилгээг ашиглаж буй иргэнийг; “Үйлчилгээ” гэж англи, солонгос, хятад хэлний яриа, бичгийн чадвар, үгийн санг хөгжүүлэх Talking Gym аппликейшн, talking-gym.mn вэбсайт болон хэрэглэгчийн тусламжийн үйлчилгээг тус тус ойлгоно.

1.4. Бодлого нь Үйлчилгээний хүрээнд Хэрэглэгчээс шууд ирүүлсэн болон Үйлчилгээг ашиглах явцад үүссэн мэдээлэлд хамаарна. Мэдээлэл хүлээн авах бусад байгууллага, тэдгээрийн гүйцэтгэх үүргийг Бодлогын Тавдугаар хэсэгт заав.

Хоёр. Цуглуулах мэдээллийн төрөл

2.1. Бүртгэлийн мэдээлэлд Хэрэглэгчийн нэр, и-мэйл хаяг эсхүл утасны дугаар, хэрэглэгчийн дугаар, нэвтрэлт болон баталгаажуулалтын мэдээлэл хамаарна. Нууц үгийг эх хэлбэрээр нь бус, хэшлэх аргаар хувирган хадгална.

2.2. Өмнөх хувилбарт Google эсхүл Apple-аар нэвтэрсэн бүртгэл байгаа тохиолдолд тухайн үйлчилгээнээс олгосон таних дугаар, дамжуулахыг зөвшөөрсөн нэр, и-мэйл хаягийг хүлээн авна. Тэдгээр бүртгэлийн нууц үгийг Компани авахгүй.

2.3. Профайлын мэдээлэлд сонгосон аватар эсхүл Хэрэглэгчийн оруулсан зураг хамаарна. Хувийн зураг оруулах үед зөвхөн сонгосон файлыг авч, хэмжээг нь багасган хадгална. Зургийн сан дахь бусад файлыг авахгүй бөгөөд профайлын зургийг хиймэл оюунаар /AI/ үнэлүүлэхээр илгээхгүй.

2.4. Суралцах мэдээлэлд сонгосон хэл, түвшин, зорилго, дасгалын хариулт, ярианаас хөрвүүлсэн бичвэр, үнэлгээ, AI зөвлөгөө, гүйцэтгэсэн дасгал, ярьсан хугацаа, хадгалсан болон сурсан үг, суралцах ахиц хамаарна.

2.5. Дуу хоолой, бичвэрийн мэдээлэлд түвшин тогтоох, ярианы дасгал хийх, AI coach-той харилцах үед илгээсэн дуу, бичгийн хариулт, ярианы агуулга хамаарна. Хэрэглэгч хариултдаа өөрийн эсхүл бусдын хувийн мэдээллийг оруулсан бол тухайн мэдээлэл мөн боловсруулагдана.

2.6. Тохиргооны мэдээлэлд сануулгын цаг, цагийн бүс, олгосон зөвшөөрөл, дууны бичлэг хадгалах сонголт хамаарна. Серверээс мэдэгдэл илгээх боломж идэвхжсэн үед төхөөрөмжид мэдэгдэл хүргэх зориулалттай таних код ашиглаж болно.

2.7. Техникийн мэдээлэлд IP хаяг, серверт хандсан хугацаа, төхөөрөмж болон хөтчөөс дамжуулсан мэдээлэл, алдаа, хандалт, аюулгүй байдлын бүртгэл хамаарна.

2.8. Өмнө үүссэн гүйлгээ байгаа тохиолдолд нэхэмжлэлийн дугаар, дүн, гүйлгээний төлөв, үйлчилгээ үзүүлэгчийн лавлах дугаар, үйлчилгээ ашиглах эрхийн мэдээллийг хадгална. Банкны нэвтрэх нууц үг, картын хамгаалалтын кодыг Компани авахгүй.

2.9. Хэрэглэгч тусламж хүссэн тохиолдолд түүний холбоо барих мэдээлэл, ирүүлсэн асуулт, тайлбар болон хавсаргасан файлыг хүлээн авна.

Гурав. Мэдээлэл ашиглах зорилго

3.1. Компани нь Хэрэглэгчийн бүртгэлийг үүсгэх, нэвтрэлтийг баталгаажуулах, бүртгэлийн аюулгүй байдлыг хангах зорилгоор мэдээлэл ашиглана.

3.2. Хэрэглэгчийн сонгосон хэл, түвшин, зорилгод нийцсэн хичээл үзүүлэх, ярианы болон бичгийн хариултыг үнэлэх, зөвлөгөө өгөх, суралцах ахицыг хадгалах, төхөөрөмж хооронд мэдээллийг шинэчлэхэд ашиглана.

3.3. Хэрэглэгчийн тохируулсан сануулгыг хүргэх, асуулт болон тусламжийн хүсэлтийг шийдвэрлэхэд ашиглана.

3.4. Үйлчилгээ ашиглах эрх, ашигласан хэмжээ, хязгаарыг тооцох, давтан бүртгэлээр ашиглалтын хязгаарлалтыг тойрохоос сэргийлэхэд ашиглана.

3.5. Системийн алдаа засах, зөвшөөрөлгүй хандалтаас хамгаалах, хуульд заасан шаардлагыг биелүүлэх, маргаан шийдвэрлэхэд шаардлагатай мэдээллийг ашиглана.

3.6. Компани нь Хэрэглэгчийн дасгалын хариулт, дуу хоолой, профайлын зураг, суралцах түүхийг нийтэд нээлттэй байдлаар түгээхгүй.

3.7. Компани нь хувийн мэдээллийг сурталчилгааны зорилгоор худалдахгүй. Одоогийн аппликейшн, вэбсайтад Хэрэглэгчийн бусад аппликейшн, вэбсайт дахь үйлдлийг дагаж хянах сурталчилгааны хэрэгсэл ашиглахгүй.

Дөрөв. Дуу хоолой болон AI үйлчилгээний мэдээлэл боловсруулалт

4.1. Ярианы болон бичгийн дасгалын хариултыг боловсруулах үед дууны бичлэг, хөрвүүлсэн эсхүл бичсэн хариулт, дасгалын даалгавар, сонгосон хэл, түвшнийг OpenAI үйлчилгээнд дамжуулна. Зүй бус хэрэглээнээс сэргийлэх зориулалтаар хэрэглэгчийг ялгах тусгай код мөн дамжуулж болно.

4.2. AI coach-той шууд яриа эхлүүлэх үед микрофоноор хүлээн авсан дуу OpenAI үйлчилгээнд шууд дамжина. Ярианаас хөрвүүлсэн бичвэр болон зөвлөгөөг Хэрэглэгчийн түүхэнд хадгална. Компани нь шууд ярианы дууг өөрийн серверт бичлэг болгон хадгалахгүй.

4.3. Зарим төхөөрөмж дээр өөр аппликейшнд шилжсэн ч эхлүүлсэн яриа үргэлжилж болно. Хэрэглэгч дуу дамжуулахыг зогсоохын тулд яриаг дуусгах эсхүл микрофоныг хаах шаардлагатай.

4.4. Монгол орчуулга хүссэн тохиолдолд AI coach-ийн сонгосон хариултыг OpenAI-д, орчуулгыг дуугаар сонсох үед орчуулсан бичвэрийг ElevenLabs-д дамжуулна. Тухайн хариултад Хэрэглэгчийн хувийн мэдээллийг ишилсэн бол тэр хэсэг мөн дамжина. Профайлын зургийг эдгээр үйлчилгээнд илгээхгүй.

4.5. Дасгалын бичлэгийг боловсруулахад серверт түр үүсгэсэн файлыг боловсруулалт дууссаны дараа устгана. Хөрвүүлсэн бичвэр, үнэлгээ, ярианы түүхийг тусад нь хадгална.

4.6. AI үйлчилгээ үзүүлэгчийн мэдээлэл хадгалах нөхцөл нь тухайн байгууллагын гэрээ, бодлого, тохиргооноос хамаарна. Talking Gym-ээс мэдээлэл устгах нь AI үйлчилгээ үзүүлэгчид байгаа бүх хуулбарыг тэр даруй устгахгүй.

4.7. AI-ийн хариулт алдаатай байж болно. Хэрэглэгч дасгал, ярианд бүтэн нэр, гэрийн хаяг, сургуулийн нэр, утасны дугаар, нууц үг, санхүүгийн болон эрүүл мэндийн хувийн мэдээлэл оруулахгүй байхыг зөвлөж байна. Хүүхдийн мэдээлэлд Бодлогын Есдүгээр хэсэг хамаарна.

4.8. Энэхүү Бодлого болон Үйлчилгээний нөхцөлийг аппликейшн доторх веб харагдацаар танилцуулна. Доод хэсэгт байрлах аппликейшний зөвшөөрөх товч нь хоёр баримт бичгийг зөвшөөрснийг хадгална. AI-д мэдээлэл дамжуулах зөвшөөрлийг мөн дэлгэцийн тусдаа сонголтоор илэрхийлнэ; зөвхөн баримт бичгийг нээсэн, уншсан, эсхүл шинэчилсэн хувилбар нийтэлсэн нь AI зөвшөөрөлд тооцогдохгүй. AI зөвшөөрлийг Профайлаас цуцалж болно; цуцлах нь өмнө боловсруулсан түүхийг автоматаар устгахгүй.

Тав. Гуравдагч этгээдэд мэдээлэл дамжуулах

5.1. Компани нь Үйлчилгээний зарим хэсгийг ажиллуулах зорилгоор дараах байгууллагын үйлчилгээг ашиглана. Дамжуулах мэдээлэл нь Хэрэглэгчийн ашиглаж буй боломж, сонгосон нэвтрэх аргаас хамаарна.

5.2. OpenAI: дууг бичвэрт хөрвүүлэх, хариулт үнэлэх, AI coach-той ярилцах, зөвлөгөө өгөх, орчуулах, агуулгын аюулгүй байдлыг шалгах. Мэдээлэл боловсруулах, хадгалах нөхцөл.

5.3. ElevenLabs: Хэрэглэгчийн сонгосон монгол орчуулгыг дуугаар уншиж өгөх. Нууцлалын бодлого.

5.4. WeSend: бүртгэл үүсгэх, нууц үг сэргээх, холбоо барих мэдээлэл солих үед и-мэйл хаяг эсхүл утасны дугаар, код, баталгаажуулалтын төлөвийг ашиглан баталгаажуулах код илгээх, шалгах. Үйлчилгээний мэдээлэл.

5.5. Google, Apple: Өмнөх хувилбарт үүссэн холбоотой бүртгэлийг баталгаажуулах. Одоогийн iOS хувилбар нь и-мэйл, утасны дугаараар нэвтрэх боломжтой. Google-ийн нууцлалын бодлого, Apple-ийн нууцлалын бодлого.

5.6. Firebase болон төхөөрөмжийн мэдэгдлийн үйлчилгээ: серверээс мэдэгдэл илгээх боломж идэвхжсэн үед төхөөрөмжийн таних код, мэдэгдлийн агуулгыг ашиглан мэдэгдэл хүргэх. Дасгал, үгийн энгийн сануулгыг төхөөрөмж дээр товлох бөгөөд үүнд мэдэгдлийн таних код илгээх шаардлагагүй. Мэдээлэл хамгаалах нөхцөл.

5.7. Amazon Web Services (AWS): аппликейшний сервер, өгөгдлийн сан, нөөц хуулбарыг байршуулж ажиллуулах. Одоогийн үндсэн сервер, өгөгдлийн сан Япон улсын Токио бүсэд байрлана. Нууцлалын бодлого.

5.8. Vercel: танилцуулгын вэбсайт, админ хуудсыг байршуулж ажиллуулах, вэб хандалт болон техникийн бүртгэлийг боловсруулах. Нууцлалын бодлого.

5.9. QPay / Wire: холбогдох гүйлгээ байгаа тохиолдолд өмнө үүссэн нэхэмжлэл, гүйлгээний лавлах дугаар, дүн, төлөвийг шалгаж баталгаажуулах.

5.10. Дээрх үйлчилгээний зарим нь гадаад улсад ажилладаг тул Хэрэглэгчийн мэдээлэл Монгол Улсаас гадна боловсруулагдаж болно. Мэдээллийг гадаад улсад дамжуулахад холбогдох хуульд заасан үндэслэл, зөвшөөрлийн шаардлагыг баримтална.

5.11. Тусламж үзүүлэх, аюулгүй байдлыг хангах, эрх бүхий байгууллагын хууль ёсны шаардлагыг биелүүлэхэд шаардлагатай хэмжээнд мэдээлэлд хандаж болно.

Зургаа. Хэрэглэгчийн сонголт, зөвшөөрөл

6.1. Хэрэглэгч нь төхөөрөмжийн тохиргооноос микрофон ашиглах зөвшөөрлийг өөрчилж болно. Зөвшөөрлийг хаасан үед дуугаар дасгал хийх, AI coach-той шууд ярих боломжгүй болно. Түвшин тогтоох ярианы алхмыг алгасаж, боломжтой тохиолдолд бичгийн даалгавар хийх эсхүл түвшнээ өөрөө сонгож болно.

6.2. Хэрэглэгч хувийн зураг оруулахгүйгээр бэлэн аватар ашиглах эрхтэй. Өөр зураг эсхүл аватар сонгоход серверт хадгалсан өмнөх профайлын зураг солигдоно эсхүл устна.

6.3. Хэрэглэгч нь аппликейшний сануулгын тохиргоо болон төхөөрөмжийн мэдэгдлийн зөвшөөрлийг өөрчилж болно.

6.4. Хэрэглэгч Профайл → AI мэдээлэл дамжуулах зөвшөөрөл хэсгээс AI-д цаашид мэдээлэл дамжуулах зөвшөөрлөө цуцалж болно. Бусад мэдээлэл боловсруулах зөвшөөрлөө цуцлах хүсэлтийг talkinggymedu@gmail.com хаягаар гаргаж болно. Үйлчилгээнд зайлшгүй шаардлагатай мэдээллийг боловсруулах боломжгүй болсон тохиолдолд холбогдох Үйлчилгээг үргэлжлүүлэн үзүүлэх боломжгүй байж болно.

6.5. Бодлоготой танилцах, аппликейшн татах, микрофон ашиглах зөвшөөрөл өгөх нь мэдээллийг AI үйлчилгээнд дамжуулах зөвшөөрлийг орлохгүй. AI боломжийг анх ашиглахын өмнө мэдээллийн төрөл, хүлээн авагч, зорилгыг тайлбарлаж, тусад нь зөвшөөрөл авна. Зөвшөөрлийн хувилбар, төлөв, насны бүлэг, асран хамгаалагчийн зөвшөөрөл өгсөн мэдүүлэг болон шинэчилсэн огноог тухайн бүртгэлтэй холбон серверт хадгална. Төхөөрөмж дээр мөн зөвшөөрлийн төлөв хадгалах бөгөөд шинэ төхөөрөмж дээр дахин танилцуулна. Зөвшөөрлөө цуцлахад серверийн баталгаажуулалт шаардлагатай; холболт тасарвал аппликейшн алдаа харуулж, дахин илгээх боломж олгоно.

6.6. Зөвшөөрөл цуцалсан нь түүнээс өмнө хууль ёсоор мэдээлэл боловсруулсан үйлдлийг буцаан хүчингүй болгохгүй.

Долоо. Мэдээлэл хадгалах хугацаа

7.1. Хэрэглэгчийн бүртгэл байгаа хугацаанд нэр, зураг, тохиргоо, суралцах түүхийг хадгална. Удаан хугацаанд нэвтрээгүй бүртгэлийг автоматаар устгах хугацаа одоогоор тогтоогоогүй. Бүртгэл устгах үед үндсэн өгөгдлийн сан дахь хувийн мэдээллийг Бодлогын Наймдугаар хэсэгт заасны дагуу устгана.

7.2. Баталгаажуулах код нь богино хугацаанд хүчинтэй байна. Кодын хугацаа дуусахад холбогдох бүх бүртгэл шууд устахгүй бөгөөд хуучин хүсэлтийн мэдээллийг дараагийн баталгаажуулалтын хүсэлт боловсруулах үед цэвэрлэнэ.

7.3. Дасгалын бичлэг боловсруулахад ашигласан серверийн түр файлыг боловсруулалт дууссаны дараа устгана. Шууд ярианы дууг Компани өөрийн серверт хадгалахгүй. Бичлэг хадгалах тохиргоог идэвхжүүлсэн тохиолдолд Хэрэглэгчийн төхөөрөмж дээр бичлэг үлдэж болно. Уг тохиргоог унтраах нь өмнө хадгалсан файл болон AI үйлчилгээ үзүүлэгчид байгаа хуулбарыг устгахгүй.

7.4. Бүртгэл устгасны дараа гүйлгээг тулгаж шалгах лавлагаа, бүртгэл устгасан тухай тэмдэглэл, ашигласан хугацааны тооцооны зарим мэдээлэл хадгалагдана. Давтан бүртгэлээр ашиглалтын хязгаарлалтыг тойрохоос сэргийлэх зорилгоор и-мэйл хаяг эсхүл утасны дугаарыг нууц түлхүүртэй хэш код болгон хадгална. Уг кодоор хуучин нэр, зураг, ярианы түүхийг сэргээхгүй боловч ижил мэдээллээр дахин бүртгүүлснийг таних боломжтой тул хэрэглэгчтэй огт холбох боломжгүй мэдээлэлд тооцохгүй.

7.5. Үндсэн өгөгдлийн сангаас устгасан мэдээлэл өмнөх нөөц хуулбарт хэсэг хугацаанд үлдэж болно. Өдөр тутмын өгөгдлийн сангийн нөөц хуулбарыг ойролцоогоор долоо хоногийн дараа цэвэрлэх тохиргоотой. Серверийг бүхэлд нь хуулсан болон гараар авсан нөөц хуулбар үүнээс удаан хадгалагдаж болно.

7.6. Гүйлгээ, аюулгүй байдлын зарим бүртгэл, тусламж хүссэн и-мэйл, гараар авсан нөөц хуулбарыг автоматаар устгах нэгдсэн хугацаа одоогоор хэрэгжээгүй. Эдгээрийг хадгалах хэрэгцээ нь хуулийн шаардлага, маргаан шийдвэрлэх, аюулгүй байдлыг хангах, систем сэргээхтэй холбоотой байна.

7.7. Хэрэглэгч нь өөрт хамаарах үлдсэн мэдээлэл, түүнийг хадгалах үндэслэлийн талаар тайлбар авах, устгуулах хүсэлтийг talkinggymedu@gmail.com хаягаар гаргаж болно.

7.8. Гуравдагч үйлчилгээ үзүүлэгчид хадгалагдах хуулбар болон аюулгүй байдлын бүртгэлд тухайн байгууллагын нөхцөл, тохиргоо үйлчилнэ. Холбогдох мэдээллийг Бодлогын Тавдугаар хэсгийн холбоосоор үзэх боломжтой.

Найм. Хэрэглэгчийн эрх, бүртгэл устгах

8.1. Хэрэглэгч нь холбогдох хуульд заасны дагуу өөрийн мэдээллийн талаар тайлбар, хуулбар авах, алдаатай мэдээлэл засуулах, устгуулах, зөвшөөрлөө цуцлах, мэдээлэл боловсруулж буйтай холбоотой гомдол гаргах эрхтэй.

8.2. Хэрэглэгч нэр, зураг болон засах боломжтой холбоо барих мэдээллээ аппликейшний профайл хэсгээс өөрчилж болно. Бүртгэлээ устгахдаа Профайл → Бүртгэлийн мэдээлэл → Бүртгэл устгах хэсэгт орж, баталгаажуулах цонхонд сонголтоо батална. Аппликейшнээс гарах эсхүл төхөөрөмжөөсөө устгах нь сервер дэх хэрэглэгчийн бүртгэлийг устгахгүй.

8.3. Бүртгэл устгах үйлдэл амжилттай дуусахад нэвтрэх мэдээлэл, нэр, и-мэйл хаяг, утасны дугаар, хувийн зураг, профайл, тохиргоо, суралцах түүх, хадгалсан үг, ярианы бичвэр, AI үнэлгээг үндсэн өгөгдлийн сангаас устгах эсхүл хувийн мэдээллийг нь арилгана. Бүх төхөөрөмж дээрх өмнөх нэвтрэлт хүчингүй болох бөгөөд дахин бүртгүүлсэн тохиолдолд өмнөх суралцах түүх сэргэхгүй.

8.4. Бүртгэл устгасны дараа үлдэх зарим мэдээлэл, нөөц хуулбарт Бодлогын Долдугаар хэсгийн нөхцөл үйлчилнэ.

8.5. Аппликейшнд нэвтрэх боломжгүй эсхүл мэдээлэлтэй холбоотой бусад хүсэлттэй Хэрэглэгч talkinggymedu@gmail.com хаягаар хандана. Хүсэлт шийдвэрлэхийн өмнө мэдээллийн эзэн мөн эсэх, шаардлагатай тохиолдолд хууль ёсны төлөөлөх эрхийг баталгаажуулна.

8.6. Эцэг эх, хууль ёсны асран хамгаалагч нь хүүхдийн мэдээллийг авах, засуулах, устгуулах, өгсөн зөвшөөрлөө цуцлах хүсэлт гаргаж болно. Анхны хүсэлтэд нууц үг, баталгаажуулах код, хүүхдийн хувийн мэдээлэл бүхий баримт бичиг хавсаргах шаардлагагүй.

8.7. Хэрэглэгчийн мэдээлэлтэй холбоотой эрхийг Хүний хувийн мэдээлэл хамгаалах тухай хуульд заасан хүрээнд хэрэгжүүлнэ. Хувийн мэдээлэл хамгаалахтай холбоотой гомдлыг Монгол Улсын Хүний эрхийн Үндэсний Комисс болон холбогдох эрх бүхий байгууллагад гаргаж болно.

Ес. Хүүхдийн хувийн мэдээлэл

9.1. Talking Gym нь 13 болон түүнээс дээш насны хүмүүст зориулагдсан. 13 нас хүрээгүй хүүхэд Үйлчилгээг ашиглах боломжгүй. 13–17 насны хэрэглэгч эцэг эх, эсхүл хууль ёсны асран хамгаалагчийн зөвшөөрөлтэйгөөр ашиглана.

9.2. Нөхцөл, нууцлалын бодлогыг зөвшөөрөх дэлгэц дээр Хэрэглэгч насны бүлгээ сонгоно. 13–17 насны хэрэглэгчийн эцэг эх, эсхүл хууль ёсны асран хамгаалагч нөхцөл, нууцлалын бодлоготой танилцаж, зөвшөөрлөө өөрөө өгнө. AI үйлчилгээнд мэдээлэл дамжуулах зөвшөөрөл нь уг дэлгэцийн тусдаа сонголттой. Энэ нь нас, асран хамгаалах эрхийг баримт бичгээр баталгаажуулах ажиллагаа биш; иргэний үнэмлэхийн хуулбар, төрсөн огноо шаардахгүй.

9.3. 13 нас хүрээгүй хүүхэд ашиглаж байгаа, эсхүл асран хамгаалагчийн зөвшөөрөлгүйгээр хүүхдийн мэдээлэл ирүүлсэн байж болзошгүй гэж үзвэл talkinggymedu@gmail.com хаягаар мэдэгдэнэ үү. Компани хүсэлтийг шалгаж, шаардлагатай тохиолдолд тухайн бүртгэлийн ашиглалтыг зогсоох, мэдээллийг устгах арга хэмжээ авна.

9.4. Эцэг эх, асран хамгаалагч нь Профайлаас AI зөвшөөрлийг цуцлах, хүүхдийн бүртгэлийн мэдээллийг засуулах, устгуулах хүсэлтийг talkinggymedu@gmail.com хаягаар гаргах боломжтой. Аюулгүй байдалтай холбоотой асуудлыг Профайл → Асуудал мэдээлэх хэсгээр мэдэгдэнэ. Имэйлд нууц үг болон шаардлагагүй хувийн мэдээлэл бүү оруулаарай. Энэ суваг нь яаралтай тусламжийн үйлчилгээ биш.

9.5. AI агуулгад автомат шалгалт хийж, зохисгүй гэж илэрсэн агуулгаар дасгал, яриаг үргэлжлүүлэхийг зогсооно. Шууд ярианы дууг бодит хугацаанд дамжуулдаг тул хариу бүрийг сонсгохоос өмнө бүрэн шалгах баталгаа байхгүй. Асуудал илэрвэл яриаг зогсоож, итгэдэг насанд хүрсэн хүнд хэлнэ үү. Үйл ажиллагааны бүртгэлд шалгалтын төрөл, үр дүнг хадгалж болох боловч үүнд ярианы бүтэн бичвэрийг оруулахгүй.

Арав. Мэдээллийн аюулгүй байдал

10.1. Компани нь мэдээлэл дамжуулахдаа HTTPS хамгаалалттай холболт ашиглаж, нууц үгийг хэшлэх аргаар хувирган хадгална. Хэрэглэгчийн нэвтрэлт, мэдээлэлд хандах эрхийг шалгах, хүсэлтийн давтамжийг хязгаарлах арга хэмжээ хэрэгжүүлнэ.

10.2. Профайлын зураг, суралцах мэдээлэлд хандахын тулд тухайн Хэрэглэгч нэвтэрсэн эсхүл үйлчилгээний зохих эрхтэй байх шаардлагатай.

10.3. Мэдээллийн системийг эрсдэлээс бүрэн ангид гэж баталгаажуулах боломжгүй. Хэрэглэгч нь төхөөрөмжийн түгжээ, нууц үг, баталгаажуулах кодын нууцлалыг хадгалж, бүртгэлд сэжигтэй хандалт илэрсэн тохиолдолд Компанид мэдэгдэнэ.

Арван нэг. Вэбсайт болон төхөөрөмжийн мэдээлэл хадгалалт

11.1. Танилцуулгын вэбсайт болон Бодлоготой бүртгэлд нэвтрэхгүйгээр танилцах боломжтой. Нийтийн хуудсанд сурталчилгааны зорилгоор хэрэглэгчийг дагаж хянах, зан төлөвийг шинжлэх хэрэгсэл ашиглахгүй. Вэбсайтыг ажиллуулах сервер нь хандалт, IP хаяг болон техникийн мэдээллийг бүртгэж болно.

11.2. Админ хэсэгт эрх бүхий ажилтны нэвтрэлтийг хадгалах куки болон хэлний сонголт ашиглана.

11.3. Мобайл аппликейшн нь нэвтрэлтийн мэдээлэл, сүүлийн ашигласан төлөв, хичээл, тохиргоог төхөөрөмж дээр хадгална. Серверээс бүртгэл устгах нь төхөөрөмж дээр үлдсэн дууны бичлэг, түр хадгалсан мэдээлэл болон төхөөрөмжийн нөөц хуулбарыг автоматаар устгахгүй.

Арван хоёр. Бодлогын өөрчлөлт, холбоо барих

12.1. Мэдээлэл ашиглах зорилго, мэдээлэл хүлээн авах үйлчилгээ үзүүлэгч, хадгалах нөхцөл болон Хэрэглэгчийн эрхэд нөлөөлөх өөрчлөлт гарсан тохиолдолд Компани нь Бодлогыг шинэчилж, огнооны хамт энэ хуудсанд нийтэлнэ.

12.2. Мэдээллийг шинэ зорилгоор ашиглах, өөр байгууллагад дамжуулахад нэмэлт зөвшөөрөл шаардлагатай бол холбогдох шаардлагыг мөрдөнө. Бодлогын шинэчилсэн хувилбар нийтэлснийг Хэрэглэгч зөвшөөрөл өгсөнд тооцохгүй.

12.3. Үйлчилгээ ашиглах бусад нөхцөлийг Үйлчилгээний нөхцөлд тусгана.

12.4. Хэрэглэгч нь Бодлого болон хувийн мэдээлэлтэй холбоотой асуулт, хүсэлт, гомдлыг дараах хаягаар гаргана. И-мэйлээр нууц үг, баталгаажуулах код, банкны нэвтрэх мэдээлэл илгээхгүй.